酸種麵包專門店 有聽過或去過 ”Passion by Gérard Dubois” 嘅話應該會對”Sour Dough” 呢個名字有啲印象。”Sour Dough”同 ”Passion by Gérard Dubois” 一樣，由瑞士糕餅名廚Gérard Dubois主理。Cafe座落於灣仔皇后大道東呢條人來人往嘅街道上，採用半開放式設計，適合帶埋寵物一齊嚟開餐。靠牆邊位置另有堂食坐位，買完麵包咖啡可以坐喺室內慢慢歎。店鋪取名為 ”Sour Dough”，一睇就知道以酸種麵包作主打，特別之處係採用培育咗30幾年嘅酸種麵糰做出麵包同埋其他烘培品，難怪一開張就吸引咗一班麵包控去辦襯😆😆 我自己就幫襯過兩次，一次係Soft opening時候只做外賣(所有食物用外賣包裝，取食物後可以於店內用餐)，另一次就係堂食。兩次都係選擇早餐時間去，人流比較少，排隊買食物及搵位都容易啲。以酸種麵糰製做嘅食物都幾多選擇，酸種麵包、牛角包、千層撻等。食過幾款產品後覺得牛角包最好味，內裡充滿牛油香，咬落外層酥化，真係一試難忘。另一樣我覺得唔錯嘅就係「蘋果千層酥」喇。一層層酥皮層次分明，蘋果餡料好豐滿，加上我兩次食都咁啱遇上新鮮出爐，真係無得頂！ ▫️蘋果千層酥 (HKD32) ▫️牛油果雞肉三文治 (HKD58) ▫️杏仁酸種牛角包(HKD28) ▫️酸種芝士蛋餅 - 三文魚 (HKD45)